تمام التمام

تمام التمام
كلمات/ أحمد أحمدأبوالعزايم حواله
***
كل شيء ماشي تمام التمام
باكل وباشرب وافرفش وانام
وبركب مواصلة بكل احترام
وكل المصالح ماشيه بنظام
تعليم وصحة وبيئة ومساكن
كله عنايه .. وكله اهتمام
تمام التمام
تمام التمام
مايتنا صافية تغني الغناوي
والزرع طارح يحكي الحكاوي
مليش مبُيد مليش كيماوي
كله طبيعي .. حلاوة زمان
والصحة فينا تهد المكان
ولا حد عنده كِلى وسرطان
تمام التمام
تمام التمام
محدش في شغله يكسل ويهمل
محدش بيطلب رشوة وحرام
محدش بيشتم محدش بيلعن
محدش بيغلط بأي كلام
محدش بينسى أبداً فقير
محدش بياكل مال اليتيم
محدش ضميره مات من زمان
تمام التمام
تمام التمام
وتمشي في شوارع تقول يا سلام
وعي ورقي ونظافة وجمال
كله في مكانه واقف تمام
ولا مرة شوفت فوضى وزحام
جناين وورد وفل وريحان
ونسمة هوانا تداوي الزُكام
تمام التمام
تمام التمام
محدش يصدع لغيره ودان
محدش يزمر في كل أوان
محدش ينادي طماطم بكام
ولبس البنات وقار واحتشام
محدش بيجرح بعينه مدام
وكله يسلم .. يرد السلام
تمام التمام
تمام التمام
حياتي يوماتي أخر سعادة
راتبي يكَفي ويفضل زيادة
وعايش كإني باقضي أجازة
ولا عمري أشغل بالي بحاجة
ولا جه في خاطري أسيب المكان
ما دام كله ماشي تمام التمام
تمام التمام
تمام التمام
***